Məşhur Azərbaycan milyonçu və xeyriyyəçisi Hacı Zeynalabdin Tağıyevin həyat və fəaliyyətindən bəhs edən “Səxavət dünyasının sərvəri” kitabının təqdimatı keçirilib.
“TEAS Press” Nəşriyyat evində çap olunmuş əsərin Bakıdakı “LIBRAFF” kitab mağazasında keçirilən təqdimat mərasimində tarixçilər, ictimai xadimlər və kitabsevərlər iştirak ediblər. Tədbirdə kitabın müəllifi – tarix elmləri doktoru Fərhad Cabbarov əsər haqqında ətraflı məlumat verib. O bildirib ki, kitabın hazırlanması zamanı 4 ölkənin arxiv materiallarından istifadə edilib: “Tağıyev haqqında bir çox yanlış fikirlərlə yanaşı əfsanələşmiş məsələlər də mövcuddur. Çalışmışıq kitabda bunların hamısına aydınlıq gətirək”.
Milli Tarix Muzeyinin direktoru, akademik Nailə Vəlixanlı, professorlar – Ədalət Tahirzadə, Solmaz Rüstəmova-Tohidi, Əməkdar mədəniyyət işçisi Rahib Azəri çıxış edərək kitab haqqında fikirlərini bölüşüblər.
XQ
