Beynəlxalq bazarlarda Brent markalı neftin bir barreli 76,15 dollara satılır.
Ötən gün 76,50 dollara qədər bahalaşan Brent markalı neftin bir barelinin qiyməti bu səviyyədə qala bilməyib və günü 75,83 dollarla başa vurub. “Brent” markalı neftin bir barelinin qiyməti bu gün saat 09:44-ə olan bağlanış qiyməti ilə müqayisədə 0,4 faiz artaraq 76,15 dollar olub. Eyni zamanda West Texas Intermediate (WTI) markalı xam neftin bir barreli 73 dollara alınıb.
Neft qiymətləri ABŞ-da makroiqtisadi məlumatların açıqlanmasından sonra bahalaşıb.
ABŞ Ticarət Nazirliyinin dünən açıqladığı 2024-cü ilin oktyabr-dekabr dövrü üçün ümumi daxili məhsul (ÜDM) məlumatlarına görə, ABŞ iqtisadiyyatı dördüncü rübdə 2,3 faiz artıb. Bu faiz bazar gözləntilərindən aşağı idi. Digər tərəfdən, ABŞ iqtisadiyyatının 2024-cü ildə 2,8% böyüməsi gözlənilir ki, bu da bazar oyunçularının neft tələbi ilə bağlı narahatlığını azaldacaq və qiymətləri yüksəldəcək.
Bundan əlavə, ABŞ-da işsizlik müavinəti üçün müraciətlər keçən həftə bazar gözləntilərindən aşağı 207,000-ə düşüb və bu, tələbin artacağına dair gözləntiləri gücləndirib və qiymətlərin yüksəlməsinə səbəb olub.
Bundan əlavə, fevralın 3-nə planlaşdırılan OPEC+ toplantısı bazar oyunçuları tərəfindən yaxından izlənilir. Bu yaxınlarda ABŞ-ın Rusiyaya qarşı neft sanksiyaları qlobal tədarükdən 1 milyon bareldən çox neftin çıxarılmasına səbəb olub. Bu vəziyyət tədarük çatışmazlığı ilə bağlı narahatlığı artıra, qiymətlərin yüksələn hərəkətlərini dəstəkləyə və istehsalçı ölkələrin istehsal planlarını yenidən nəzərdən keçirməsinə səbəb ola bilər.
