Martın 22-də Novxanıdakı “Hacı Səfəralı” məscidində iftar süfrəsi verilib, Qarabağ Dirçəliş Fonduna ianə edilib.
Mövzu ilə bağlı Moderator.az-a açıqlama verən millət vəkili Elman Məmmədov, bu cür addımların həm tarixi adət-ənənələrimizin davamı, həm də Qarabağımızın tərəqqisi üçün mühüm əhəmiyyətə malik olduğunu bildirib:
“Şəhid ailələrinin, veteranların iştiakı ilə iftar süfrələrinin təşkili olduqca gözəl bir ənənədir. Azərbaycan xalqı, türk dünyası hər zaman öz milli-mənəvi dəyərlərinə bağlı olub, tarixi ənənələrinə, dininə, şəhid ailələrinə çox böyük hörmətlə yanaşıb. Bu baxımdan iftar süfrələrinin təşkili, bu məclislərdə həssas kateqoriyadan olan vətəndaşlarımızın iştirakının təmin edilməsi olduqca qürurvericidir.
Doğma Qarabağımızın bərpa edilməsi, onun qısa zamanda dirçələrək çiçəklənməsi də xalq olaraq, dövlət olaraq, eləcə də fərd olaraq hər birimizin qarşısında duran əsas vəzifələrdən biridir. Bu baxımdan iftar süfrəsi çərçivəsində, həm də Qarabağ Dirçəliş Fonduna ianənin edilməsi, bu gözəl ideyanın təbliği olduqca təqdirəlayiqdir. Qarabağın dirçəldilməsi müqəddəs missiyadır və bu missiyada yer alan hər kəs alqışlanmalıdır. Mən bu mütərəqqi ideyanın daşıyıcılarına, təşkilatçılaırna öz təşəkkürümü bildirir, uğrular arzulayıram”.
Seymur ƏLİYEV
