Haaqa, 1 aprel, AZƏRTAC
Avropada yaşayan azərbaycanlı kimi məqsədimiz ölkəmizə qarşı ədalətsiz qətnamələrin ləğvini tələb etmək, Xocalıda, eləcə də digər Azərbaycan ərazilərində ermənilərin azərbaycanlılara qarşı törətdiyi soyqırımı aktlarını dünyaya çatdıraraq, ədalət tələb etməkdir. Mən də gənc və aktiv diaspor üzvü qismində belə etiraz nümayişlərinin təşkilini vacib hesab edir və onlara qatılıram.
Bu fikirləri Haaqada “Sülh və Ədalət Sarayı”nın qarşısında ədalət çağırışı ilə etiraz aksiyasının iştirakçısı və Xocalı faciəsində çox sayda yaxınını itirmiş Ayxan Sadıxov AZƏRTAC-a müsahibəsində deyib.
“Azərbaycan heç vaxt müharibə istəməyib, həmişə sülh istəyib. Bu gün səsləndirdiyimiz məsələlərlə bağlı Ermənistan hökumətinə rəsmi məlumat göndərərək, onların razılaşmasını və sülh imzalanmasını tələb etmişik. Ermənistan Azərbaycanın tələblərinə məhəl qoymayıb. Sonda Azərbaycan öz torpaqlarını müharibə ilə azad etməyə məcbur oldu.
Bu gün Niderlanddakı ədalət məhkəməsi qarısında toplaşaraq, Avropada ölkəmizə qarşı qəbul edilmiş qərarların ləğvini tələb edirik. Onlar Azərbaycandakı hərbi cinayətkarların azad edilməsini istəyirlər. Bu nümayişlə onların diqqətinə çatdırırıq ki, ölkəmizdə həbsdə olan ermənilərin heç biri mülki şəxs və ya sıravi əsgər deyil. Onlar I və II Qarabağ müharibələrinin təşkilatçıları və hərbi cinayətkarlardır. Onlar layiq olduqları cəzanı almalıdırlar”,- deyə A.Sadıxov vurğulayıb.
