"UFC turnirinin Bakıda keçirilməsi Azərbaycanın regional liderlik mövqeyinin möhkəmləndirilməsi istiqamətində atılan mühüm addımdır".
Bunu gənclər və idman naziri Fərid Qayıbov deyib.
Nazir Prezident İlham Əliyevin əvəzsiz dəstəyi və diqqəti, həmçinin onun uğurlu idman siyasəti sayəsində Azərbaycanın beynəlxalq aləmdə mövqeyinin gücləndiyini vurğulayıb. Onun sözlərinə görə, Bakı şəhəri artıq nəhəng beynəlxalq idman tədbirlərinin keçirildiyi aparıcı mərkəzə çevrilib.
Fərid Qayıbov əlavə edib ki, UFC ilə qurulan bu tərəfdaşlıq, həmçinin idmanın inkişafına və beynəlxalq əməkdaşlığa verdiyi önəm, Azərbaycanın qlobal idman mərkəzi kimi nüfuzunun daha da artmasına xidmət edəcək.
UFC prezidenti Dana Uayt isə Azərbaycanın və xüsusilə Bakı şəhərinin qlobal idman tədbirlərinin keçirilməsində mövcud olan güclü təcrübəyə diqqət çəkib:
"Bu regionda bir çox görkəmli döyüşçümüz var. Buna görə də Bakı növbəti inkişaf mərhələsi üçün ən uyğun seçim oldu. Mən iyunun 21-də keçiriləcək debüt turnirini təqdim etməkdən şadam".
UFC-nin vitse-prezidenti və "UFC Eurasia"nın baş direktoru Andrey Qromovski son 6 ildə Avrasiya regionunda ilk dəfə UFC turnirinin keçirilməsi ilə bağlı məmnunluğunu ifadə edərək deyib:
"Bir neçə ildir üzərində çalışdığımız bu tərəfdaşlıq, regionda inkişaf strategiyamızın əsas elementidir".
İyunun 21-də Bakıda keçiriləcək UFC turniri çərçivəsində baş tutacaq əsas döyüş artıq bəlli olub.
Bu barədə məlumat idman təşkilatı tərəfindən açıqlanıb.
Bildirilib ki, gecənin əsas qarşılaşmasında Camahal Hill və Xəlil Rauntri üz-üzə gələcək.
Biletlər aprelin 25-dən satışa çıxarılacaq.
Qeyd edək ki, daha əvvəl qeyri-rəsmi mənbələrdən Bakıdakı turnirdə Körtis Bleydis - Rizvan Kuniyev, İsmayıl Naurdiyev - Cun Yunq Park, Hamdi Abdelvahab - Məhəmməd Usman cütlüklərinin döyüşü anons edilib.
Mənbə: oxu.az
