İspaniya millisinin sabiq hücumçusu David Vilya “Barselona”nın ulduzu Lamin Yamalı argentinalı Lionel Messi ilə müqayisə etməkdən imtina edib.
Arena.az Vilyanın müvafiq qənaətini təqdim edir:
“Mən Lamin Yamalı Lionel Messi ilə müqayisə etməyəcəyəm. Düşünürəm ki, hər hansı bir oyunçunu Messi ilə müqayisə etmək zəhlətökəndir. Lamin artıq dünya ulduzudur və son iki ildə mühüm nəticələr əldə edib. Mən isə onun və azarkeşlər üçün çox xoşbəxtəm. Əlbəttə, onun üçün sevinməyə haqqım var, amma onu Messi ilə müqayisə etməyə ehtiyac olduğunu düşünmürəm”, deyə David Vilya fikrini əsaslandırıb.
Lamin Yamal “Barselona”nın yetirməsidir. İstedadlı yeniyetmə 2022/2023-cü illər mövsümündən Kataloniya təmsilçisinin əsas komandasında çıxış edir. Yamalın “Barselona” ilə müqaviləsinin müddəti 2026-cı ilin iyun ayının sonuna qədər qüvvədədir.
Cari mövsümdə Yamal “blauqrana”nın heyətində bütün yarışlarda 21 oyuna çıxıb, 6 qol və 12 məhsuldar ötürmə ilə fərqlənib.
Lamin Yamalın “Barselona”da çıxışının ümumi mənzərəsi 72 oyun, 13 qol və 21 məhsuldar ötürmədən ibarətdir.
Yamal 2023-cü ilin sentyabrında debüt etdiyi İspaniya yığma komandasının heyətində 17 oyun keçirib, 3 qol vurub, 8 məhsuldar ötürmə verib.
Lamin Yamalın qənimətlər muzeyində “Barselona” ilə 2022/2023-cü illər mövsümündə qazandığı İspaniya La Liqası var. Həmçinin Yamal İspaniya yığması ilə AÇ-2024-ün qalibi olub.
“Transfermarkt” internet-portalı 17 yaşlı ispaniyalı cinah hücumçusunun transfer dəyərini 180 milyon avro məbləğində qiymətləndirir.
