Bu qərarla bağlı bizə məlumat verilib və onu nəzərdən keçirməyi planlaşdırırıq.
Teleqraf.com xəbər verir ki, bunu Avropa İttifaqının (Aİ) İrəvandakı səfiri Vasilis Maraqos Ermənistan hökumətinin ölkənin Aİ-yə qoşulması prosesinin başlanması ilə bağlı qanun layihəsini təsdiqləmək qərarını şərh edərkən deyib.
Diplomat qeyd edib ki, Aİ-nin Ermənistanla çox sıx əlaqələri var və bunu dərinləşdirməyə çalışır.
“Bizim “Davamlılıq və böyümə” proqramı var (red. - bu proqram çərçivəsində Ermənistana 270 milyon avro ayrılmalıdır). Ermənistan hakimiyyəti ilə müsbət istiqamətdə gedən Aİ-Ermənistan münasibətləri ilə bağlı bütün məsələləri müzakirə edirik”, - Maraqos vurğulayıb.
Səfirdən Ermənistanın Avropa İttifaqına üzv olmaq üçün fürsət görüb-görmədiyini soruşulduqda o söyləyib ki, əgər İrəvan Aİ-yə daxil olmaq istəyirsə, bu, onun qərarıdır.
“Aİ müqaviləsində üzvlüyün necə baş verməsini izah edən müddəalar var”, - Maraqos əlavə edib.
Xatırladaq ki, hökumət dünən keçirilən iclasında “Ermənistan Respublikasının Avropa İttifaqına qoşulması prosesinin başlanması haqqında” qanun layihəsini təsdiqləyib.
