“Bayern”in alman dayaq yarımmüdafiəçisi Yozua Kimmix Münhen klubundakı gələcəyi ilə bağlı sualı növbəti dəfə cavablayıb.
Arena.az “Bayern & Germany” dərgisinə istinadən, alman futbolçunun bu barədə fikrini təqdim edir.
“Mən klubla danışmışam. Özümə çox təzyiq etmək istəmirəm. Amma əlbəttə, yaxın aylarda qərar vermək gərək olacaq. Müqavilənin yenilənməsi üçün bir çox yaxşı səbəb var.
Müqavilə müddətinin uzadılması ehtimalı keçən yaydan xeyli yüksəkdir, çünki mən futbolu necə oynadığımızı görürəm. Bunun isə məşqçi ilə çox əlaqəsi var. Bütün Almaniya görür ki, biz fərqli futbol oynayırıq, indi hər bir xüsus daha da yaxşı görünür. Mən məşq etməyi və meydana çıxmağı xoşlayıram”, deyə Kimmix vurğulayıb.
Xatırladaq ki, 2024-cü ilin sentyabrında Kimmix “Bayern”lə müqaviləsinin müddətini 2025-ci ilin iyun ayının sonuna qədər uzatmağa razılaşıb. Tərəflər arasında cari müqavilənin yenilənməsi üzrə danışıqlar davam etdirilir.
Yozua Kimmix “Bayern”ə 2015-ci ilin iyulunda 8,5 milyon avro məbləğ müqabilində “Ştutqart”dan keçib.
Kimmix cari mövsümdə münhenlilərin heyətində 25 oyuna çıxıb, 1 qol vurub, 6 məhsuldar ötürmə verib.
Kimmixin “Bayern”in heyətində çıxışının ümumi mənzərəsi 415 oyun, 43 qol, 110 məhsuldar ötürmədən ibarətdir.
Yozua Kimmix hazırda kapitanı olduğu, 2016-cı ilin may ayında debüt etdiyi Almaniya yığmasının heyətində 97 oyuna 7 qol və 22 məhsuldar ötürmə ilə fərqlənib. Kimmix bundestimlə 2017-ci il FIFA Konfederasiyalar Kubokunu qazanıb. Həmçinin Yozua Almaniyanın U-19 yığması ilə Avropa çempionatının qalibi olub.
Kimmix “Bayern”in heyətində 8 dəfə Almaniya Bundesliqasının, 3 dəfə Almaniya Kubokunun, 6 dəfə Almaniya Super Kubokunun və hərəsi 1 dəfə olmaqla UEFA Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
“Transfermarkt” internet-portalı 29 yaşlı alman futbolçunun transfer dəyərini 50 milyon avro məbləğində qiymətləndirir.
Əlavə edək ki, Kimmix bir çox aparıcı Avropa klublarının, xüsusilə “Barselona”nın maraq dairəsindədir.
