Qəzza zolağında saxlanılan israilli girovların azad edilməsi üzrə danışıqlarda irəliləyiş var. Bunu İsrailin xarici işlər naziri Gideon Saar bildirib.“The Times of Israel” xəbər verir ki, o, danimarkalı həmkarı Lars Løkke Rasmussen ilə görüşdən sonra Qüdsdə keçirdiyi mətbuat konfransında danışıqlarda müəyyən irəliləyişin olduğunu deyib.Saar vurğulayıb ki, İsrail tərəfi girovlarla bağlı razılaşma əldə etmək istəyir. “İsrail amerikalı dostları ilə girovlarla bağlı razılığa gəlmək üçün çalışır və biz yaxın vaxtlarda qarşı tərəfin də bunu istəyib-istəmədiyini biləcəyik”, - deyə o əlavə edib.Razılaşmaların əldə olunması üçün mümkün müddətlər barədə suala cavab verən nazir konkret proqnozlar verməkdən yayınıb: "İrəliləyiş var. Dedim ki, hər şey əvvəlkindən qat-qat yaxşı görünür, amma bundan artıq danışmaq istəmirəm. Çünki başa düşürəm ki, hər sözə, hər ifadəyə çox həssas yanaşan ailələr var. Ümid edirəm ki, tezliklə nəyinsə baş verdiyini görəcəyik, lakin bunun hələ də təsdiqlənməsi lazımdır".
