Yanvarın 14-də Vaşinqtonda ABŞ Dövlət Departamentində Ermənistan Respublikası ilə Amerika Birləşmiş Ştatları arasında Strateji Tərəfdaşlıq Xartiyasının imzalanması mərasimi olub.
Ermənistan Respublikası adından sənədi xarici işlər naziri Ararat Mirzoyan, ABŞ tərəfindən isə dövlət katibi Antoni Blinken imzalayıb. Xartiyanın tam mətni aşağıda təqdim olunur.
Ermənistan Respublikası və Amerika Birləşmiş Ştatları:
"Dostlar və strateji tərəfdaşlar kimi münasibətlərimizin vacibliyini təsdiq edirik. Biz hər iki xalqın xeyrinə tərəfdaşlığımızı dərinləşdirmək və qarşılıqlı prioritetlərin geniş spektri üzrə əməkdaşlığımızı genişləndirmək niyyətindəyik. İki demokratik ölkə arasındakı bu əməkdaşlığın ortaq dəyərlərə və ümumi maraqlara əsaslandığını vurğulayırıq. Bunlara demokratiya və iqtisadi azadlığın inkişafı, suverenliyin və ərazi bütövlüyünün müdafiəsi, qanunun aliliyinin və insan hüquqlarına və əsas azadlıqlarına hörmətin gücləndirilməsi, innovasiyaların və texnoloji tərəqqinin dəstəklənməsi və enerji təhlükəsizliyinin gücləndirilməsi daxildir. Diplomatik, iqtisadi, enerji, yüksək texnologiyalar, təhsil, elm, mədəniyyət, hüquq, müdafiə və təhlükəsizlik sahələrində əlaqələrimizi gücləndirmək üçün qarşılıqlı istəyimizi vurğulayırıq".
Qeyd olunub ki, Birləşmiş Ştatlar həmçinin Ermənistanla qonşuları arasında münasibətlərin normallaşmasının tərəfdarı olmaq niyyətindədir.
