Rusiyada bu il yazın tez gəlməsi gözlənilir. Meteoroloqlar qış mövsümünün beş-on gün əvvəl bitəcəyini proqnozlaşdırıblar.
Hafta.az-ın “Business FM”ə istinadən yazdığına görə, Meteoweb layihəsinin hava eksperti Aleksey Safonov bu vəziyyəti qlobal iqlim dəyişikliklərinin təsiri ilə izah edir. Safonovun sözlərinə görə, 2023 və 2024-cü illər tarixin ən isti illəri olub və bu tendensiya 2025-ci ildə də davam edəcək. Ancaq bu vəziyyət müvəqqəti soyuq dalğalar kimi risklər daşıyır. Xüsusilə Moskva və ətraf ərazilərdə qar örtüyünün normadan xeyli aşağı olması qeyri-adi qış mövsümünün göstəricisidir.
Bu iqlim dəyişikliklərinin kənd təsərrüfatı sektoruna təsiri diqqətəlayiqdir. Ulyanovskda fəaliyyət göstərən ekoloq Aleksey Yakuşev bildirib ki, payızda əkilən buğdaya hava şəraiti mənfi təsir göstərir. Gec əkin edən fermerlər buğdalarının cücərmədiyini və ya zəif qaldığını müşahidə ediblər. İndi qarın əriməsi nəticəsində yaranan buz təbəqəsi bitkilərin nəfəs almasına mane ola və əkinlərə zərər verə bilər. Yakuşev bildirir ki, buğda sağ qalsa, istehsalçılar rahatlaşacaq.
Digər tərəfdən, isti hava bəzi kənd təsərrüfatı məhsulları üçün əlverişli ola bilər. Ramen rayonundan olan Vladimir Akatyev bildirdi ki, mülayim qış şəraiti kartofun saxlanması prosesini asanlaşdırır. Akatyevin sözlərinə görə, qış həddindən artıq soyuq keçərsə, anbarların qızdırılması tələb oluna bilər ki, bu da xərcləri artıran amildir. Lakin bu il belə problem yaşanmadığından payızlıq taxıllara ziyan dəyməyib.
Ümumiyyətlə, aqrar sektorun nümayəndələri indiki hava şəraitində böyük risk görmürlər. Bununla belə, üstünlük təşkil edən fikir ondan ibarətdir ki, güclü şaxtalar və qarın olmaması kimi hallar məhsuldarlığı təhdid edə bilər.
Böyük Novqoroddan Denis Pavlyuk bildirir ki, hazırda məhsul üçün böyük təhlükə yoxdur. Bununla belə, o qeyd edir ki, isti havalar saxlama xərclərini artırır. Rusiyanın qərb və cənub bölgələrində isti havalar davam edərkən, Qərbi və Cənubi Avropada sərt soyuq havanın təsirli olduğu qeyd edilir.
