Fransanın paytaxtı Parisdə keçirilən XXXIII Yay Olimpiya və Paralimpiya Oyunlarında mükafat qazanan 100-dən artıq idmançının qazandığı medallar keyfiyyət səbəbindən geri qaytarılıb. Təəssüf ki, Azərbaycan idmançıları da bu halla rastlaşıblar. “Paris-2024”-də gümüş mükafat qazanan taekvondoçu Qaşim Maqomedov (58 kq) və yunan-Roma güləşi üzrə yarışlarda bürünc medal əldə edən Həsrət Cəfərovun (67 kq) medallarının keyfiyyətini itirməsi aşkar edilib.
Bu barədə Milli Olimpiya Komitəsinin mətbuat xidməti məlumat yayıb. Bildirilib ki, Paris Olimpiadasında medal qazanan digər mükafatçılarımızın medallarının keyfiyyəti də yoxlanılacaq. Əgər həmin medallarda da hansısa bir dəyişiklik aşkar edilərsə, onların geri qaytarılması üçün Beynəlxalq Olimpiya Komitəsinə (BOK) rəsmi müraciət ünvanlanacaq. Ali qurum müraciəti təsdiqlədikdən sonra medallar yenisi ilə əvəz olunacaq.
Xatırladaq ki, çoxsaylı şikayətlərdən sonra Paris Oyunlarının Təşkilat Komitəsi zədə və ya keyfiyyətsizliyə görə şikayət edən bütün idmançıların medallarını dəyişdirəcəyini vəd edib.
L.QURBANOVA
XQ
