2024-cü ildə paytaxtda təşkil olunan “Kənddən şəhərə” və Arıçılıq məhsullarının 24-cü Respublika Sərgi-Satış Yarmarkalarında 50 bölgədən 422 fermer öz məhsulunu satışa çıxarıb.
Modern.az xəbər verir ki, yarmarkalarda fermerlər tərəfindən alıcılara 300-dən çox çeşiddə kənd təsərrüfatı məhsulu təqdim olunub, ümumilikdə 303.5 ton məhsulun satışı həyata keçirilib.
Kiçik və orta fermer təsərrüfat sahibləri ilə yanaşı, kənd təsərrüfatı məhsullarının istehsalı və emalı ilə məşğul olan 2 kooperativ qrup və 4 şirkətin yarmarkada iştirakı təmin edilib.
Yarmarkaların təşkilində əsas məqsəd fermerlər üçün alternativ satış kanalı yaratmaq və şəhər sakinlərinin kənd təsərrüfatı məhsullarına olan tələbatını daha dolğun təmin etməkdir.
Qeyd edək ki, yarmarkada iştirak tamamilə ödənişsizdir. Fermerlər burada piştaxta, tərəzi və digər lazımi avadanlıqlarla təmin olunurlar.
Arıçılıq məhsullarının Respublika Sərgi-Satış Yarmarkalarında iştirak üçün fermerlərin Elekron Kənd Təsərrüfatı İnformasiya Sistemində şəxsi kabineti olmalı və müəyyən edilmiş tarixdə qeydiyyatdan keçməlidirlər.
“Kənddən Şəhərə” yarmarkalarında iştirak etmək istəyən fermerlər +994 50 400 88 99 çağrı mərkəzi ilə əlaqə saxlaya və ya yarmarkanın sosial şəbəkə hesabları üzərindən müraciət edə bilərlər.
