Braziliyanın “Botafoqo” klubunun hücumameyilli yarımmüdafiəçisi Tyaqo Almada bundan sonra Lion “Olimpik”inin formasını geyinəcək.
Arena.az bu barədə Fransa klubunun rəsmi saytına istinadən xəbər verir.
Liqa 1 təmsilçisi 23 yaşlı argentinalı futbolçunu cari mövsümün sonunadək icarəyə götürüb. O, 2025-ci ilin 30 iyununa qədər Lionda çıxış edəcək. Yayda “Olimpik”in Almadanın transfer hüquqlarını alıb-almayacağı bilinmir. Almada yeni klubunda 23 nömrəli formanı geyinəcək.
Tyaqo Almada Argentinanın “Veles Sarsfild” klubunun yetirməsidir. O, Amerika Birləşmiş Ştatlarında “Atlanta Yunayted” klubunun da formasını geyinib. Yarımmüdafiəçi “Botafoqo”ya 2024-cü ilin iyul ayında 19,5 milyon avro müqabilində məhz “Atlanta Yunayted”dən keçib. Argentinalı futbolçu Braziliya klubunun heyətində meydana çıxdığı 26 oyunda 3 qol və 2 məhsuldar ötürmə müəllifi olub.
Almada Argentinanın U-20, U-23 və Olimpiya yığmalarında oynadıqdan sonra 2022-ci ilin sentyabr ayında əsas millidə debüt edib. Yarımmüdafiəçi indiyə qədər ölkəsinin yığmasında 6 oyuna çıxıb, 2 qola imza atıb.
“Transfermarkt” internet-portalı 23 yaşlı yarımmüdafiəçinin transfer dəyərini 27 milyon avro məbləğində qiymətləndirir.
Lion “Olimpik”inin braziliyalı mərkəz müdafiəçisi Adrielson isə Fransa klubunu tərk edib. 26 yaşlı futbolçu Belçikanın “Anderlext” klubuna icarəyə verilib. Sözügedən klub braziliyalını bu mövsümün sonuna kimi satınalma şərti ilə icarəyə götürüb.
Adrielson Braziliyanın “Sport Resife” klubunun yetirməsidir. O, karyerası ərzində “Əl-Vasl”, “Botafoqo” kimi klublrın da formasını geyinib. Müdafiəçi Lion “Olimpik”inə 2024-cü ilin yanvarında “Botafoqo”dan 3,58 milyon avro müqabilində keçib. O, Lion klubunda cəmi 4 oyuna çıxıb. Bu üzdən ötən il icarə əsasında yenidən “Botafoqo”ya qayıdan Adrielson bu mövsüm də “Anderlext”ə keçməli olub.
Adrielson Braziliyanın U-17 və U-23 yığmalarında oynasa da, əsas milliyə dəvət almayıb.
“Transfermarkt” internet-portalı 26 yaşlı müdafiəçinin transfer dəyərini 4 milyon avro məbləğində qiymətləndirir.
