Norveçdən olan futbol mütəxəssisi Ole Qunnar Sulşer Türkiyənin “Beşiktaş” komandasının baş məşqçisi vəzifəsinə təyin olunub.
Arena.az bu barədə İstanbul klubunun mətbuat xidmətinə istinadən məlumat verir.
“Qara-qartallar” 51 yaşlı mütəxəssisin fotosunu sosial şəbəkə hesablarında paylaşıb. Postda “Ole, Ole, Ole” yazılıb. Tərəflər 1,5 illik müqaviləyə imza atıblar.
Xatırladaq ki, norveçli mütəxəssis 2019-cu ilin martından 2021-ci ilin noyabrına qədər “Mançester Yunayted”in baş məşqçisi vəzifəsində çalışıb. 2018-ci ilin dekabrından 2019-cu ilin martına qədər isə Sulşer “qırmızı şeytanlar”ın baş məşqçi vəzifəsinin icraçısı olub. O, 2021-ci ildə İngiltərə klubundan ayrılandan sonra iki il işsiz olub, 2023-cü ilin yanvarından bəri UEFA-da matç analizi ilə məşğul idi.
51 yaşlı Ole Qunnar Sulşer daha öncə “Mançester Yunayted”dən başqa “Molde” və “Kardiff Siti” komandalarını da çalışdırıb. Sulşer “Molde”ni iki dəfə (2010/2011 və 2011/2012) Norveç çempionu, bir dəfə (2012/2013) Norveç Kubokunun qalibi edib.
Norveçli mütəxəssis “Beşiktaş”da ötən ilin noyabr ayında istefaya göndərilmiş Covanni van Bronkhorstu əvəz edib. Niderlandlı mütəxəssisin istefasından sonra “qara qartallar”a müvəqqəti olaraq Serdar Topraktepe rəhbərlik edirdi.
Xatırladaq ki, “Beşiktaş” Türkiyə Super Liqasının cari mövsümündə 18 oyun keçirib, 8 qələbə, 6 heç-heçə və 4 məğlubiyyət görüb. “Qara qartallar” hazırda 30 xalla 19 iştirakçı arasında 6-cı sırada qərarlaşıblar.
