Milli Məclisin 45 saylı Sumqayıt dördüncü seçki dairəsindən deputatı Səbinə Salmanova seçicilərilə birbaşa ünsiyyətdə olmaq, onların qayğı və ehtiyaclarını daha da dərindən öyrənmək üçün şəhərin bir sıra məhəllə sakinlərinin iştirakı ilə səyyar görüş keçirib.
50-dən çox seçicinin iştirakı ilə baş tutan görüşdə millət vəkili ona ünvanlanan sual və müraciətləri dinləyib, seçiciləri narahat edən məsələlər ətrafında fikir mübadiləsi aparıb.
Vətəndaşlar əsasən məişət problemləri, məhəllədaxili yolların təmiri, söhbətgahların quraşdırılması, təhsil, işlə təminat, səhiyyə və digər məsələlərlə bağlı millət vəkilinə müraciət ediblər.
Görüş zamanı bir sıra məsələlər yerindəcə həll olunub. Eyni zamanda, qaldırılan bəzi məsələlər nəzarətə götürülüb, digərlərinin həlli istiqamətində isə müvafiq tövsiyələr verilib.
Deputat daxil olmuş müraciətlərə yüksək həssaslıqla yanaşılması barədə dövlət başçısının verdiyi tapşırıqlara uyğun olaraq, daxil olmuş vətəndaş müraciətlərinin tam və hərtərəfli araşdırılaraq, onların həlli istiqamətində qanunvericiliyin tələblərinə uyğun şəkildə addımların atılacağını seçicilərinin diqqətinə çatdırıb.
Səbinə Salmanova, həmçinin vətəndaşlara Prezident İlham Əliyevin yürütdüyü uğurlu daxili və xarici siyasət, işğaldan azad edilmiş ərazilərimizin bərpası, ölkəmizdə həyata keçirilən islahatlar və xüsusilə vətəndaşlarımızın sosial təminatının yaxşılaşdırılması sahəsində ölkə başçısının imzaladığı fərman və sərəncamlar haqqında da geniş məlumat verib.
“Cebheinfo.az”
