Yeni Azərbaycan Partiyası (YAP) Xaçmaz rayon təşkilatının yaradılmasının 32 illiyi qeyd edilib. Bu münasibətlə keçirilən tədbirdə Xaçmaz Rayon İcra Hakimiyyətinin başçısı Elnur Rzayev, YAP Xaçmaz rayon təşkilatının sədri Məhəmməd Balaqadaşov, idarə və müəssisə rəhbərləri, ərazi partiya təşkilatlarının sədrləri və partiya fəalları iştirak ediblər.
Tədbir iştirakçıları əvvəlcə Ulu Öndər Heydər Əliyevin abidəsi önünə gül dəstələri düzüb, əziz xatirəsini ehtiramla yad ediblər.
Çıxış edənlər Ümummilli Lider Heydər Əliyev tərəfindən Yeni Azərbaycan Partiyasının təsis edilməsindən, partiyanın keçdiyi çətin və şərəfli mübarizə yolundan, Ulu Öndərin dövlətimiz qarşısında göstərdiyi böyük xidmətlərdən danışıblar.
Qeyd olunub ki, Ulu Öndər Heydər Əliyev tərəfindən əsası qoyulmuş inkişaf siyasəti partiyanın Sədri, Prezident İlham Əliyev tərəfindən uğurla davam etdirilir. Dövlətimizin başçısının yürütdüyü siyasət ölkəmizin beynəlxalq müstəvidə layiqli yerini möhkəmləndirib.
