Minlərlə insan, o cümlədən hüquq mühafizə orqanları və tədbirin təşkilində iştirak edən bir sıra dövlət qulluqçuları ABŞ-nin yeni seçilmiş Prezidenti Donald Trampın andiçmə mərasiminin yerinin hava şəraiti səbəbindən dəyişdirilməsi barədə bəyanatından çaşqın qalıblar.
Bu barədə Bakıvaxtı.az "Washington Post" nəşrinə istinadən xəbər verir.
"Hüquq-mühafizə orqanlarının əməkdaşları təcili iclaslar çağırıblar. Konqres üzvləri dəyişikliklər barədə mətbuatdan xəbər tutublar və daha sonra şənliklərə bilet almış seçicilərdən daxil olan yüzlərlə zəngi cavablandırmalı olublar", – nəşr yazır.
Daha əvvəl Tramp soyuq hava səbəbindən andiçmə mərasiminin qapalı məkanda keçirilməsi barədə göstəriş verdiyini təsdiqləyib və tədbirin əsas hissəsi Kapitoli rotondası​nda təşkil olunacaq. Proqnozlara görə, yanvarın 20-də Vaşinqtonda temperaturun -12 dərəcəyə qədər enməsi gözlənilir.
Qeyd olunur ki, işçilər Trampın and içəcəyi Kapitoli rotondası​nda tez bir zamanda yeni tribunanın quraşdırılmasına başlayıblar. Ölkənin hər yerindən təyyarə biletləri alan və Vaşinqtonda hotel bron edən minlərlə insan paytaxta səfər planlarını yenidən nəzərdən keçirməli olub.
