Azərbaycanın Diasporla İş üzrə Dövlət Komitəsinin sədri Fuad Muradov Türkiyəyə işgüzar səfəri çərçivəsində yanvarın 20-də İqdır vilayətinin azərbaycanlı icmasının nümayəndələri ilə görüş keçirib.
Hafta.az xəbər verir ki, İqdırdakı Azərbaycan Evində baş tutan görüşdə xaricdəki Azərbaycan diasporunun səylərini birləşdirməyin yolları ətrafında fikir mübadiləsi aparılıb.
Müzakirələrdə Azərbaycanın Qarsdakı baş konsulu Zamin Əliyev, dövlət komitəsinin məsul əməkdaşları, eləcə də Qarsda keçirilən “Qış təlimləri - 2025”də iştirak edən Azərbaycan hərbi qulluqçuları iştirak ediblər.
Fuad Muradov dövlətin diaspor təşkilatlarının inkişafına maksimum diqqət yetirdiyini və soydaşlara hər cür dəstəyi göstərməyə hazır olduğunu bildirib.
Dövlət komitəsinin sədri qeyd edib ki, bu gün dünyanın 19 ölkəsində ümumilikdə 30 Azərbaycan Evi fəaliyyət göstərir. “Bu strukturlar Azərbaycan mədəniyyətinin mühüm təbliğat mənbəyidir və gənclərin vətənpərvərlik ruhunda tərbiyə olunmasına öz töhfəsini verir. “Azərbaycan evlərinin fəaliyyətində icmalar ən fəal iştirak etməlidir”, - deyən Fuad Muradov rəhbərlik etdiyi strukturun dünyanın 70 ölkəsindəki soydaşlarımızla əməkdaşlıq proqramları həyata keçirdiyini, xüsusilə diaspor nümayəndələri üçün Azərbaycana, o cümlədən respublika ərazisinin işğaldan azad edilmiş ərazilərinə səfərlər təşkil etdiyini diqqətə çatdırıb.
O, Türkiyədəki Azərbaycan təşkilatlarının vahid federasiya çərçivəsində birləşməsinin vacibliyini vurğulayıb. “Azərbaycanın maraqları naminə xaricdəki azərbaycanlılar arasında birliyin və koordinasiyanın təmin edilməsi çox vacibdir”, - deyə dövlət komitəsinin sədri vurğulayıb.
