Məşhur Bollivud aktyoru Saif Əli Xan yanvarın 16-na keçən gecə evinə hücum edən şəxs tərəfindən bıçaqlanandan sonra ağır əməliyyat olunub. Hazırda aktyorun həyatı üçün təhlükə yoxdur.
Hafta.az-ın yazdığına görə, aktyora hücum Hindistanın Mumbay şəhərində Xan ailəsinin yaşadığı mənzildə baş verib. Şəhər polisindən verilən məlumata görə, aktyor gecə saatlarında evinə girən naməlum şəxslə qarşılaşması nəticəsində xəsarət alıb. Soyğun məqsədilə evə girdiyi ehtimal edilən hücumçu aktyorun boyun və onurğa nahiyəsinə 6 bıçaq zərbəsi vurub. Polis hadisəni araşdırmaq üçün xüsusi qruplar yaradıb.
“Saif Əli Xan uğurlu əməliyyat keçirib və hazırda onun həyatı təhlükədən kənarda qalıb. O, sağalma mərhələsindədir, həkimlər onun vəziyyətini izləyirlər”, - Xanın komandasının açıqlamasında bildirilir.
Əməliyyatdan sonra Lilavati xəstəxanasının həkimi Nitin Danqe bildirib ki, bıçağı çıxarmaq və onurğa mayesinin axını dayandırmaq üçün əməliyyat aparılıb. Onun sözlərinə görə, sol qolunda və boynunda daha iki dərin yara plastik cərrahlar qrupu tərəfindən əməliyyat olunub.
Hücumun tam təfərrüatları hələlik məlum deyil.
Saif Əli Xan Bollivudun digər məşhur ulduzu Karina Kapurla evlidir. Onların iki övladı var. Karina Kapur İnstaqram səhifəsində "bu hadisə ailəmiz üçün çox günlər yaşatdı” yazıb.
Aktrisa bütün mediadan və paparassilərdən mövzunu işıqlandırarkən fərziyyələrdən çəkinməyi və ailəsinə hörmətlə yanaşmağı xahiş edib.
