2024-cü ildə Bakıda keçirilən nüfuzlu COP29 konfransı çərçivəsində Azərbaycan Dəmir Yolları (ADY) dayanıqlı nəqliyyat və iqlim siyasətindəki mühüm rolunu bir daha nümayiş etdirdi.
Konfrans müddətində ADY ümumilikdə 10 minə yaxın akkreditasiyalı sərnişin daşıyaraq tədbirin təşkilati uğuruna töhfə verdi. Şirkət, müxtəlif müzakirələr və dəyirmi masalarda fəal iştirak edərək, iqlim dəyişiklikləri ilə mübarizədə dəmir yollarının əhəmiyyətini vurğuladı.
Bundan əlavə, ADY Beynəlxalq Dəmir Yolları İttifaqı ilə birgə “Dəmir yollarının iqlim öhdəliyi” sənədini imzaladı. Bu addım, dəmir yollarının karbon emissiyalarının azaldılmasında önəmli bir vasitə olduğunu bir daha təsdiq etdi.
ADY-nin COP29 çərçivəsindəki aktiv iştirakı dayanıqlı nəqliyyatın gələcəyinə dair qlobal səviyyədə əhəmiyyətli mesaj verdi.
