Qrip virusu son zamanlar uşaqlar və böyüklər arasında geniş yayılıb. Bu, xüsusilə soyuq havalarda və mövsümi dəyişikliklərdə, öskürək, halsızlıq, yüksək atəş şikayətləri ilə A və B qrip viruslarının yaratdığı bir infeksiyadır. Virusun artması insanlar arasında narahatlığa səbəb olur. Bəs xəstəliklərin yayıldığı bir vaxtd a bu qrip virusundan necə qorunmaq olar?
Həkim Zakir Abıyev bildirir ki, xəstəlikdən qorunmaq üçün ilk növbədə maskadan istifadə etmək lazımdır: “Böyük insan toplumu olan yerə getsə belə, tez çıxmalı, yaxud insanlarla çox kontkatda olmamalıdır. Evə qayıdarkən əlləri yumaq və əsasən soyuq havalarda başı bağlı gəzmək lazımdır. Qrip virusunun A, B və C tipli 3 növü var. Daha çox A və B tipli virus əhali arasında geniş yayılıb. Qrip özünü daha çox yüksək hərarət, əzələ ağrıları, öskürək, başağrısı və xroniki yorğunluqla göstərir. Xəstəlik adətən 2-7 gün davam edir. Əgər simptomlar çox yoxdursa, dərmanlardan istifadə məsləhət görülmür”.
Bir sözlə, xəstəlikdən qorunmağın ən yaxşı üsulu təbii vasitələrdir. Çalışın təbii, düzgün qidalardan istifadə edərək sağlamlığınızın qeydinə qalasınız.
Leyla Səməndər
