“Real”ın braziliyalı ulduz hücumçusu Vinisus Junior həmvətəni, komanda yolda Rodriqo Qoeslə nəzərdə tutduğu məqsədi açıqlayıb.
Arena.az “TNT Sports Brasil” dərgisinə istinadən məlumat verir ki, “Vini” Rodrqio ilə birlikdə “qaymaqlılar”ın fransalı ulduz hücumçusu Kilian Mbappenin bütün yarışlarda ən sərrast qolçu olması üçün çalışır:
“Biz (Vinisius, Mbappe və Rodriqo – redaktorun qeydi) – qollar vurmalı və səmərəli ötürmələr verməli olan üç hücumçuyuq. Həqiqət budur ki, komanda Kiliandan çox məmnundur.
Başlanğıc həmişə çətindir, amma o, yaxşı uyğunlaşdı. Kilian əla bir futbolçu olduğundan, uyğunlaşma zamanı da bir çox qollar vurdu. Rodriqo və mən mümkün olan hər şeyi edəcəyik ki, o, bütün yarışlarda ən yaxşı qolçu olsun, çünki o, bunun üçün buraya gəlib”, deyə “Vini” vurğulayıb.
Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Kilian PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində 32 oyuna çıxıb, 22 qol vurub, 4 məhsuldar ötürmə verib.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
Klub səviyyəsində Mbappe PSJ ilə 6 dəfə və “Monako” ilə 1 dəfə Fransa Liqa 1-in, 4 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun (2024) və FIFA Qitələrarası Kubokun (2024) qalibi olub.
“Transfermarkt” internet-portalı 26 yaşlı fransalı hücumçunun transfer dəyərini 160 milyon avro məbləğində qiymətləndirir.
