BMT-nin baş katibi Antonio Quterreş ABŞ Prezidenti Donald Trampın xarici yardımlarında fasilə elan etməsindən narahatlıq ifadə edib.
Bakıvaxtı.az xəbər verir ki, bu barədə təşkilatın rəsmi saytında məlumat yayıblı.
BMT-nin sözçüsü Stefane Dujarrik bildirib ki, bu yardımlar dünya üzrə həssas əhali qruplarının dəstəklənməsində əhəmiyyətli rol oynayır. O, humanitar və inkişaf proqramlarının davam etdirilməsinin vacibliyini vurğulayıb və belə yardımların həyata keçirilməsi üçün əlavə istisnaların nəzərdən keçirilməsini təklif edib.
Dujarrik həmçinin Tramp administrasiyası ilə qlobal problemlərin birgə həlli istiqamətində əməkdaşlığın vacibliyini qeyd edib. O, ABŞ-nin ən böyük yardım təminatçılarından biri olduğunu xatırladıb və yeni administrasiya ilə əməkdaşlığın dünya miqyasında böyük ehtiyacı olan icmalara dəstək üçün əhəmiyyətli olduğunu bildirib.
Trampın imzaladığı sərəncam xarici yardımların 90 gün müddətinə dayandırılmasını nəzərdə tutur və bu addım ABŞ-ın xarici siyasət prioritetlərinin yenidən qiymətləndirilməsi məqsədi daşıyır.
Sərəncama əsasən, İsrail və Misir üçün bəzi istisnalar tətbiq olunsa da, digər ölkələrə, o cümlədən Ukrayna, İordaniya və Tayvana verilən yardımların mənfi təsirə məruz qalacağı bildirilib.
Əli Hüseynov
