Səsvermə prosesində yüksək seçici fəallığı müşahidə olunur.
Bunu “Report”un Tərtərə ezam olunan əməkdaşına açıqlamasında 97 saylı Tərtər-Ağdərə-Goranboy seçki dairəsinin 5 saylı seçki məntəqəsinin sədri Arzu Babayeva deyib.
Onun sözlərinə görə, səsvermə prosesi qaydalara uyğun şəkildə davam edir:
“5 saylı məntəqə 97 saylı Tərtər-Ağdərə-Goranboy seçki dairəsi üzrə seçicilərin ən aktiv olduğu məntəqələrdən biridir. Səhər saat 8-dən etibarən, məntəqədə seçici fəallığı müşahidə olunur.
Məntəqə üzrə 1036 seçici qeydiyyatdadır. Onlardan 1-i səsvermə gününə qədər dünyasını dəyişib. Hazırda aktiv seçici sayı 1035 nəfərdir. Səsvermə prosesində hər hansı pozuntuya yol verilməyib”.
Qeyd edək ki, səsvermə saat 19:00-a qədər davam edəcək.
Seçkilər ölkə ərazisindəki 118 seçki dairəsini əhatə edən 5 min 846 məntəqədə keçirilir. 685 bələdiyyənin 8 min 71 üzvü üçün 16 min 92 namizəd mübarizə aparır.
Mərkəzi Seçki Komissiyasının (MSK) məlumatına əsasən, bələdiyyə seçkilərində səsvermə hüququ olan 5 milyon 961 min 987 seçici var.
