Braziliyalı ulduz hücumçu Neymar “Əl-Hilal”dan ayrıldıqdan sonra Səudiyyə Ərəbistanı təmsilçisinə müraciət ünvanlayıb.
Arena.az məlumat verir ki, “Ney” bu barədə özünün sosial şəbəkə hesabı üzərindən paylaşıb:
“Əl-Hilal”da hamıya, azarkeşlərə – təşəkkürlər! Mən bütün güc-qüvvəmi oynamaq üçün verdim və meydandakı ən yaxşı məqamlardan birlikdə zövq almağımızı diləyirəm. Səudiyyəlilər, mənə və ailəmə yeni bir ev və yeni təəssüratlar bəxş etdiyinizə görə təşəkkür edirəm. İndi əsl Səudiyyə Ərəbistanını tanıyır və ömürlük dostlarımın olduğunu bilirəm. Mən, oyuna olan məhəbbətinizi və şövqünüzü həmişə hiss edirdim. Mən sizin, bir klub və bir ölkə olaraq gələcək səyahətinizi 2034-cü ilə qədər izləyəcəyəm. Sizin gələcəyiniz inanılmaz olacaq, xüsusi məqamlar baş verir. Mən isə sizi həmişə dəstəkləyəcəyəm!”, deyə Neymar vurğulayıb.
Xatırladaq ki, “Əl-Hilal”dan ayrılmış Neymarın “Santos”la yarımillik müqaviləyə imza atdığı bildirilir.
Neymar “Santos”un məzunudur. “Ney” 2009-2013-cü illərdə “balıqlar”ın əsas komandasında çıxış edib. Bu müddət ərzində Neymar “Santos”un heyətində 225 oyuna çıxıb, 136 qol və 64 məhsuldar ötürmə ilə fərqlənib.
Neymar 2013-2017-ci illər aralığında “Barselona”da çıxış edib və “blauqrana”nı öz istəyi ilə tərk edərək, PSJ-yə keçib. Bu, hələ də futbol tarixini ən bahalı keçidi olaraq qalmaqdadır – 222 milyon avro məbləğində əməliyyat.
“Ney” “blauqrana”nın heyətində 186 oyuna çıxıb, 105 qol vurub, 76 məhsuldar ötürmə verib. Braziliyalı ulduz “Barselona” ilə İspaniya La Liqasının (2 dəfə), İspaniya Kubokunun (3 dəfə), İspaniya Super Kubokunun, UEFA Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
Avropada debütü “Barselona” ilə başlamış Neymar PSJ-də də 6 il keçirdikdən sonra 2023-cü ilin yayında “Əl-Hilal”a keçib. Tərəflər arasında sonradan 1 il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avro məbləğə başa gəlib.
Təcrübəli hücumçu “Əl-Hilal”ın heyətində bütün yarışlarda cəmi 7 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.
“Transfermarkt” internet-portalı 32 yaşlı braziliyalı hücumçunun transfer dəyərini 15 milyon avro məbləğində qiymətləndirir.
