Madrid “Atletiko”sunun baş məşqçisi Dieqo Simeone Çempionlar Liqasının Liqa mərhələsinin “Zalsburq”la səfər oyunundan gözləntisini paylaşıb.
Arena.az xatırladır ki, İspaniya klubu ÇL-in Liqa mərhələsinin 8-ci turu çərçivəsində səfərdə Avstriya “Zalsburq”u ilə qarşılaşacaq.
Madrid təmsilçisinin argentinalı çalışdırıcısı matçdan öncə baş tutan mətbuat konfransında bunları söyləyib:
“Yarış yeni bir tərtibatda başlayanda biz ən yaxşıların səkkizliyinə düşməyə ümid edirdik. Bunun çətin olacağını bilirdik və qarşıda da belə olacaq. Biz, qələbə qazanmaq üçün nə qədər çətin olacağını başa düşürük.
Mən növbəti mərhələyə kimin keçəcəyi, kimin kənarda qalacağı barədə çox da düşünmürəm. Mən qarşılaşmanı qazanmağa diqqət kökləmişəm. Böyük komandalar çətin vəziyyətlərdən əvvəl-axır çıxırlar və heç bir şübhəm yoxdur ki, sonda onlar Çempionlar Liqasında qalibiyyət uğrunda mübarizə aparacaqlar”, deyə Dieqo Simeone vurğulayıb.
7 turdan sonra “Atletiko” UEFA Çempionlar Liqasının Liqa mərhələsinin yarış cədvəlində 15 xalla 5-ci, “Zalsburq” isə 3 xalla 34-cü pillədə qərarlaşıb.
“Zalsburq” – “Atletiko” oyunu bu gün, yanvarın 29-da baş tutacaq. Hakim oyunu Bakı vaxtı ilə saat 00:00-da (30 yanvar) başladacaq.
