Vətən müharibəsindən sonra Qarabağ bölgəsində hərbi xidmətini davam etdirən Natiq Mirhüseynov 25 dekabr 2020-ci ildə Cəbrayıldan Şuşa rayonunun Daşaltı kəndinə gedərkən yolda minaya düşərək ağır yaralanıb və 37 gün koma vəziyyətində qaldıqdan sonra 30 yanvar 2021-ci ildə müalicə aldığı Silahlı Qüvvələrin Baş Klinik Hospitalında şəhidlik zirvəsinə ucalıb.
QHT.az xəbər verir ki,Azərbaycan Silahlı Qüvvələrinin giziri olan Natiq Balamirzə oğlu Mirhüseynov 25 avqust 1997-ci ildə Lerik rayonunun Orand kəndində anadan olub. 2016-2017-ci illərdə müddətli həqiqi hərbi xidmətdə olub. 2018-ci ildə ordu sıralarına geri dönərək Azərbaycan Ordusunun Təlim Tədris Mərkəzinin "Gizir hazırlıq kursu"nu müvəffəqiyyətlə başa vurub. Kursu bitirdikdən sonra əvvəlcə Beyləqan Qarnizon Hərbi Polisində, həmin ilin 5 mart tarixindən etibarən isə Lənkəran şəhərində Post Patrul komandiri vəzifəsində və "gizir" rütbəsində hərbi polis kimi xidmətini davam etdirib. Natiq Mirhüseynov 44 günlük Vətən müharibəsi zamanı Cəbrayılın, Füzulinin, Xocavəndin və Şuşanın azadlığı uğrunda gedən döyüşlərdə iştirak edib.
Natiq Mirhüseynov göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra "İgidliyə görə" medalı ilə təltif edilib.
Ruhu şad olsun!
