Yanvarın 31-də Azərbaycanda ölkə üzrə Şahmat Çempionatı başlayır.
Teleqraf.com xəbər verir ki, çempionat fervalın 15-dək davam edəcək.
Azərbaycan Şahmat Federasiyasından verilən məlumata görə, kişilərin yarışına milli komandanın üzvləri, son Azərbaycan çempionatının yarımfinalçıları, FIDE reytinqinə əsasən ən yüksək reytinqli şahmatçılar (14 iştirakçı) və I dəstədə yüksək nəticə göstərən 5 şahmatçı buraxılıb.
Qadınların yarışında millinin üzvləri, son ölkə çempionu, FIDE reytinqinə əsasən ən yüksək reytinqli 8 azərbaycanlı şahmatçı və I dəstədə yüksək nəticə göstərən 2 iştirakçı mübarizə aparır.
Azərbaycan çempionatı olimpiya sistemi üzrə təşkil edilir. Turnir FIDE qaydalarına əsasən keçirilir və 5 turdan ibarət olacaq. Turun hər bir matçı 2 klassik partiyadan (ağ-qara) və burada qeydı alına biləcək bərabərlik halında tay-breklərdən ibarətdir.
Kişi şahmatçıların çempionatının ümumi mükafat fondu 60 min, qadınlarda isə 30 min manat təşkil edir.
Qeyd edək ki, Teymur Rəcəbov və Şəhriyar Məmmədyarov başda olmaqla, bütün tanınmış şahmatçılar çempionatda çıxış edəcəklər.
