Zibil qutusuna atılacaq bir yığın əşyanın üstündə tapılan “Harri Potter və fəlsəfə daşı”nın ilk nəşri fantastik qiymətə satılacaq.
“Qafqazinfo” BBC-yə istinadən xəbər verir ki, kitab onu tapan şəxs tərəfindən hərracda 40 min funt sterlinqə (82 977 manat) satılacaq.
Bildirilib ki, çap olunan ilk 500 nəşrdən 200-ü kitab mağazalarına, 300-ü isə ictimai kitabxanalara paylanılıb.
“Harri Potter və fəlsəfə daşı”nın tapılan nəşri isə kitabxanalara paylanılan 300 kitabdan biridir. Kitabın ilk səhifəsinə karandaşla 2 funt sterlinq yazılıb ki, bu da kitabxananın satdığı qiymətdir. Həmçinin nüsxənin arxasındakı filosof sözündəki hərf səhvi onu ilk nəşr kimi müəyyən edən amillərdəndir. Digər fərqli məqam isə ilk bir neçə səhifədəki başlıq sətirində 10-dan 1-ə qədər uzanan rəqəmlərin olmasıdır.
NLB hərracının idarəçisi Daniel Pirs qeyd edib ki, normalda belə kitablar çox köhnə halda bazara çıxarılır, lakin “Harri Potter və fəlsəfə daşı”nın tapılan nəşri isə yeni kimidir.
Qeyd edək ki, kitabın noyabrda daha bir nüsxəsi tapılıb, o isə hərracda 42 min funt sterlinqə (87 142 manat) satılıb.
