Azərbaycan Milli İncəsənət Muzeyində yazıçı Qurban Səidin dünyaca məşhur “Əli və Nino” romanının əsasında “Sevgi odası: Əli və Nino balı” adlı immersiv tamaşa keçirilib. İlqar Safatın rejissorluğu ilə hazırlanan bu unikal tamaşa Azərbaycan Dövlət Akademik Rus Dram Teatrının aktyorları tərəfindən tamaşaçılara təqdim olunub.
Əli və Nino rollarında Murad İsmayıl və Səma Vəliyeva çıxış ediblər. Digər rolları isə Azərbaycanın Əməkdar artistləri Maqsud Məmmədov, Salman Bayramov, Elmira Aslanova və Yelena Spitsına ifa ediblər. Tamaşanın quruluşçu rəssamı Mustafa Mustafayev, xoreoqrafı Nigar Rzayevadır. Səhnə tərtibatı isə Valentina Reznikovaya aiddir.
Teatrın aktyor heyəti “Əli və Nino” tamaşasından kiçik səhnələr və o dövrə məxsus rəqslər ifa ediblər. Qonaqların Şərq zərifliyini və Avropa eleqantlığını əks etdirən kostyumlarda qatıldığı gecə muzeydə ecazkar ab-hava yaradıb.
Muzeyin direktoru Şirin Məlikova çıxış edərək aktyorlara və qonaqlara öz təşəkkürünü bildirib, belə gözəl sənət məkanında bu kimi maraqlı və unikal tədbirlərin davam edəcəyinə ümid etdiyini vurğulayıb.
İştirakçılar muzeydən unudulmaz təəssüratlarla ayrılıblar.
S.FİDAN
XQ
