“Liverpul”un niderlandlı mərkəz müdafəçisi və kapitanı Vircil van Deyk “qırmızılar”ın düşərgəsində böhran olub-olmadığını cavablayıb.
Arena.az BBC-yə istinadən, niderlandlı futbolçunun bu barədə cavabını təqdim edir:
“Liverpul” böhrandadırmı? Bu nəticələr Premyer Liqanın nə qədər çətin yarış olduğunu göstərir. Bu çempionatda hər oyun çətin olur, amma biz qalib gəlməyin yollarını tapmalıyıq. Əgər biz “Nottingem Forest”lə fasilədən sonra oynadığımız kimi oynasaq, əminəm ki, çoxlu qol vurmağa davam edəcəyik”, deyə Van Deyk vurğulayıb.
Xatırladaq ki, “Liverpul” 20 oyundan 47 xalla İngiltərə Premyer Liqasının yarış cədvəlinə başçılıq edir.
Vircil van Deyk 2018-ci ilin yanvarından “Liverpul”da çıxış edir. “Qırmızılar” Van Deyki o vaxt 84,65 milyon avro məbləğ müqabilində “Sauthempton”dan transfer ediblər. Van Deykin “Liverpul”la müqaviləsinin müddəti 2025-ci ilin iyun ayının sonuna qədər qüvvədədir.
Cari mövsümdə Van Deyk “Liverpul”un heyətində bütün yarışlarda 27 oyuna çıxıb, 2 qol vurub, 1 məhsuldar ötürmə verib.
Niderlandlı müdafiəçinin mersisaydlıların heyətində çıxışının ümumi mənzərəsi isə belədir: 297 oyun, 25 qol, 13 məhsuldar ötürmə.
Van Deyk “Liverpul”la İngiltərə Premyer Liqasını (2020), İngiltərə Kubokunu (2022), İngiltərə Liqa Kubokunu (2022, 2024), İngiltərə Super Kubokunu (2023), Çempionlar Liqasını (2018/2019), UEFA Super Kubokunu (2019/2020), FIFA Klub Dünya Kubokunu (2019) qazanıb. Vircil həmçinin “Liverpul”un oyunçusu kimi 2018/2019-cu illər mövsümündə ilin oyunçusu mükafatına və həmçinin həmin mövsümdə UEFA-ya görə Avropanın ən yaxşı oyunçusu mükafatına layiq görülüb.
Vircil Van Deyk hazırda kapitanı olduğu, 2015-ci ilin oktyabr ayında debüt etdiyi Niderland yığmasının heyətində 78 oyuna çıxıb, 9 qol vurub.
“Transfermarkt” internet-portalı 33 yaşlı niderlandlı mərkəz müdafiəçisinin transfer dəyərini 28 milyon avro məbləğində qiymətləndirir.
