1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
"2025-ci ilin əvvəlində məlum oldu ki, Avropa İttifaqı Ermənistan və Azərbaycan sərhədində müşahidə missiyasının müddətini iki il müddətinə uzatmaq qərarına gəlib".
Oxu.Az xəbər verir ki, Rusiya Xarici İşlər Nazirliyinin rəsmi nümayəndəsi Mariya Zaxarova Baku TV Ru-ya bu məsələ ilə bağlı ətraflı şərh verib və bu missiyanın əsl mahiyyətini və məqsədlərini açıqlayıb.
Zaxarovanın sözlərinə görə, Aİ-nin Ermənistan ərazisində bu qismən hərbi mövcudluğunun qarşıdurma xarakteri daşıdığı göz qabağındadır. O vurğulayıb ki, bu missiyanın anti-Rusiya, anti-Azərbaycan və anti-İran məqsədləri şübhə doğurmur və buna NATO ölkələri də qoşulur.
Rusiya Xarici İşlər Nazirliyinin nümayəndəsi bəyan edib ki, Aİ missiyası kollektiv Qərbin regionda mövcudluğunun möhkəmləndirilməsi üçün geosiyasi layihədir və onun əsas məqsədi vəziyyətin sabitliyinin pozulması və bundan Cənubi Qafqaz ölkələrinə qarşı istifadə edilməsidir. Mahiyyət etibarilə, bu, regionu geosiyasi rəqabət meydanına çevirir.
Bundan əlavə, Azərbaycan tərəfinin dəfələrlə bəyan etdiyi kimi, Aİ missiyası "casus missiyası həyata keçirir".
Zaxarova vurğulayıb ki, bu, Cənubi Qafqaz üçün yad cisimdir və regiondakı bütün aktual məsələlər kənar müdaxilə olmadan regional dövlətlərin kollektiv səyləri əsasında həll edilməlidir.
Mariya Zaxarova bir fakta xüsusi diqqət çəkib ki, Aİ missiyasının fəaliyyəti ilə bağlı qərarlar "faktiki olaraq rəsmi Bakıdan gizlin qəbul edilir", sabitlik və təhlükəsizliyə həyati maraq göstərən, tamhüquqlu regional oyunçu kimi Azərbaycanın maraqlarına məhəl qoyulmur.
Rusiya Xarici İşlər Nazirliyinin nümayəndəsinin daha sonra qeyd etdiyi kimi, hamı çox gözəl başa düşür ki, Avropa məkanına fəal şəkildə yeridilən Ermənistanın maraqları kollektiv Qərbi qətiyyən maraqlandırmır. O qeyd edib ki, əgər onlar həqiqətən Ermənistana kömək etmək istəsəydilər, bunun üçün bir çox imkanlar var, o cümlədən iqtisadi və maliyyə imkanları.
Ətraflı məlumat Baku TV Ru-nin videosüjetində:
