İstiqlal Muzeyində “Fəda” adlı tədbir-sərgi keçirilib

35 il öncə  yanvarın 19-dan  20-nə   keçən gecə doğma Vətəninin, xalqının azadlığını, şərəf və ləyaqətini hər şeydən uca tutan vətənpərvər Azərbaycan övladları canlarından keçərək şəhidlik zirvəsinə ucaldılar. Sovet qoşunlarının Azərbaycanda törətdiyi qanlı qırğından uzun illər keçməsinə baxmayaraq, xalqımız o dəhşətli günlərin ağrı-acısını unutmur. 20 Yanvar hadisəsi milli məfkurənin inkişafına təkan vermiş hadisədir. 20 Yanvar Azərbaycan tarixində təkcə faciə deyil, Azərbaycanın istiqlal yolunun ilk zirvəsi, milli məfkurəmizin azadlıq istəyinin oyanış günüdür. Bu, uzun illər sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir. 

Əvvəlcə tədbirdə 20 yanvar və Vətən Müharibəsi şəhidlərinin əziz xatirəsi bir dəqiqəlik sükütla yad edildi, sonra Azərbaycan Respublikasının Dövlət himni səsləndirildi. İstiqlal Muzeyinin direktoru Sədi Mirseyibli çıxışında tədbirin keçirilməsində əsas məqsəd gələcək nəslin keçmişinə sadiq vətənpərvər ruhda böyüməsini, milli iradəmizin zəfər çaldığı o günü unutmamasını vurğuladı. Elmi-ekspozisiya şöbəsinin elmi işçisi  Şəhriyar Səməndərov öz çıxışında 20 yanvar faciəsinin azərbaycan xalqının tarixində unudulmayan bir səhifə olduğunu qeyd etdi.

Tədbirin rəsmi hissəsindən sonra  AMK nəzdində İncəsənət gimnaziyasının təsviri-tədbiqi sənət üzrə direktor müavini Kəmalə Kərimova sərgi haqqında məlumat verdi. O, qeyd etdi ki,  vətənpərvərliyin tablolarda tərənnüm olunması, gənc və istedadlı rəssamların təbliğində, onların bacarıqlarının inkişaf etdirilməsində mühüm əhəmiyyət kəsb edir. 

Tədbirin bədii hissəsində  Bülbül adına musiqi məktəbin 11-ci sinif şagirdi Arzu Ağamuradova, 8-ci Muğam Müsabiqəsinin laureatı, Respublika və Beynəlxalq Muğam musabiqəsinin laureatı, xanəndə Vüsal Qasımov çıxış etdilər. 

Daha sonra qonaqlara gimnaziyanın gənc rəssamlarının  20 yanvar faciəsi mövzusunda olan əsərlərindən ibarət sərgisi nümayiş olundu.    

Tədbirdə İncəsənət gimnaziyasının gənc rəssamları, müəllim heyəti və H.Əliyev adına Hərbi İnstitutunun hərbiyyəliləri iştirak etdilər. 

 Poliqon.info

 

                                                 Daha ətraflı məlumat üçün

               Azərbaycan İstiqlal Muzeyi

                                   Ünvan: Neftçilər pr, 49, Muzey Mərkəzi

      Telefon: +9944939243

                     E-poçt: [email protected]