"Barselona"nın gənc vingeri Lamin Yamal gələn mövsümdən etibarən Lionel Messinin mirası olan 10 nömrəli formanı geyinəcək.
News24.az Oxu.Az-a istinadən xəbər verir ki, klubda oynadığı 2008-21-ci illər ərzində argentinalı ulduz Lionel Messi "Barselona"nın heyətində 10 nömrəli formanı geyinib.
Onun klubdan ayrılmasından sonra bu nömrə Ansu Fatiyə məxsus olub.
Qeyd edək ki, hazırda Yamal 19 nömrəli forma ilə çıxış edir.
Onu da əlavə edək ki, bu mövsüm Lamin bütün turnirlərdə 24 matçda iştirak edib, doqquz qol və 13 məhsuldar ötürmə ilə yadda qalıb. Futbolçunun klubla müqaviləsi 2026-cı ilin yayına kimi nəzərdə tutulub.
Qeyd edək ki, "Transfermarkt" portalına görə, L.Yamalın transfer qiyməti 180 milyon avrodur.
