“Gəncəyə gəldiyim ilk gündən qonaqpərvərliklə qarşılandım. Bu məni sevindirdi. Doğru yerə gəldiyimi hiss etdim”.
İdman.biz xəbər verir ki, bunu "Kəpəz"in yeni transferi Rati Ardazişvili klubun mətbuat xidmətinə açıqlamasında deyib.
Gürcü futbolçu ona bəslənən etimadı doğrultmağa çalışacağını bildirib: “Mənə göstərilən münasibətlə yanaşı şəraitdən də razı olduğumu deyə bilərəm. Klubun müasir bazası, məşq meydançaları var. Yeni stadion tikilir, işləri yaxınlıqdan görə bilirik. Üzərimə düşən etimadı doğrultmaqdır. Burada oynamaq mənim üçün rahatdır. Klubuma inandığım üçün Gəncəyə gəldim. Heyətimiz üzərinə düşəni edə biləcək gücdədir. Qısa vaxtda burada olmağıma baxmayaraq ab-havadan deyə bilərəm ki, komandamız elitada qalmağa fokuslanıb. Biz bir komandayıq, ailəyik, hər şeyi birlikdə etməliyik. Birgə vəziyyəti dəyişə biləcəyik. “Kəpəz”in böyük azarkeş qüvvəsi var. Sosial şəbəkələrdə yazırlar, dəstək olurlar. Onlar üçün meydanda ən yaxşısını etməyə çalışacağıq”.
Qeyd edək ki, Rati "Kəpəz"ə "Samtredia"dan (Gürcüstan) qoşulub.
İdman.biz
