Bakı Apellyasiya Məhkəməsində arvadını bıçaqlamaqda təqsirləndirilən Qulam Hacıyevin (şərti) barəsindəki hökmdən dövlət ittihamçısı tərəfindən verilən apellyasiya protesti və apellyasiya şikayətinə baxılıb.
Pravda.az-ın əldə etdiyi məlumata görə, hakim Habil Məmmədovun sədrliyi ilə keçirilən prosesdə qərar elan olunub.
Qərara əsasən, apellyasiya protesti təmin edilib, Bakı Ağır Cinayətlər Məhkəməsinin çıxardığı şərti hökmü dəyişdirilib və ona 2 il 2 ay 7 gün müddətinə azadlıqdan məhrumetmə cəzası təyin edilib. Təqsirləndirilən şəxs məhkəmə iclas zalından dərhal həbsə alınıb.
İttihama görə, Qulam Hacıyev orta dərəcəli sərxoş vəziyyətdə 08 yanvar 2024-cü il tarixdə, saat 23:30 radələrində qaynanasının paytaxt ərazisində yerləşən evə gəlib. O, arvadı, zərərçəkmiş Kəmalə Hacıyeva (şərti) ilə aralarında qısqanclıq zəminində yaranmış münaqişə zamanı bıçaqla onun bədəninin müxtəlif nahiyələrinə 3 dəfə qəsdən vuraraq xəsarət yetirib.
Hadisədən sonra Qulam Hacıyev saxlanılaraq cinayət məsuliyyətinə cəlb edilib.
Bakı Ağır Cinayətlər Məhkəməsinin hökmü ilə ona şərti cəza verilərkən məhkəmə zalından azadlığa buraxılmışdı.
Kamal Məmmədov
