Gəncə, 22 yanvar, Elcan Məmmədov, AZƏRTAC
Gəncə Dövlət Universiteti (GDU) “Times Higher Education” Asiya Ali Təhsil Mükafatları Müsabiqəsində ölkəmizdə ilk dəfə Ətraf Mühit kateqoriyasında seçilmiş 8 universitet siyahısına düşüb.
Universitetdən AZƏRTAC-ın bölgə müxbirinə verilən məlumata görə, müsabiqədə Gəncə Dövlət Universiteti “Ətraf Mühitə Verilən Müstəsna Töhfə” kateqoriyasında iştirak edib. Universitet müsabiqəyə Avropa Yenidənqurma və İnkişaf Bankı, Qafqaz Regional Ekoloji Mərkəzi, İngiltərənin Atkins Realis təşkilatı və Gəncə Dövlət Universitetindən ibarət konsorsiumun birgə hazırladığı Gəncə Yaşıl Şəhər Fəaliyyət Planına verdiyi töhfələr əsasında müraciət edib.
Qeyd edək ki, Gəncə şəhəri Azərbaycanda ilk pilot şəhər olaraq Avropa Yenidənqurma və İnkişaf Bankının (AYİB) Yaşıl Şəhərlər Proqramına qoşulub.
