İran Hərbi Hava Qüvvələrinə məxsus təyyarə qərbdəki Həmədan vilayətində qəzaya uğrayıb. Hər iki pilot sağdır. Manset.az xəbər verir ki, bu barədə İRNA agentliyi məlumat yayıb. "Hər iki pilot qəzadan əvvəl katapult edə bilib", - vilayət qubernatorunun müavini Hamze Emrai deyib. Bildirilir ki, pilotlar hazırda xəstəxanaya aparılıb və müayinə olunurlar. İlkin məlumata görə, onlar yüngül bədən xəsarətləri alıblar. Agentliyin məlumatına görə, təyyarə səhər saatlarında Kabudarahang bölgəsində qəzaya uğrayıb. Təyyarənin modeli göstərilməyib. Hazırda müstəntiqlər hadisənin səbəblərini araşdırır.
