Birləşmiş Millətlər Təşkilatı son bir ayda İsrail ordusunun işğal altındakı İordan çayının qərb sahilində həyata keçirdiyi hücumlarda altısı uşaq olmaqla 34 fələstinlinin həlak olduğunu bildirib.
"Cebheinfo.az" xəbər verir ki, Birləşmiş Millətlər Təşkilatının Humanitar İşlər üzrə Koordinasiya Ofisi (UNOCHA) İsrail ordusu və İordan çayının qərb sahilində Fələstin torpaqlarını qəsb edən israillilərin hücumları ilə bağlı yazılı açıqlama verib.
Açıqlamada hücumlar nəticəsində həyatını itirən fələstinlilərdən altısının uşaq olduğu bildirilib.
İsrail ordusunun İordan çayının qərb sahilindəki “Cenin” qaçqınlar düşərgəsinə dörd gündür davam edən hücumlarında 12 fələstinlinin öldüyü, 50 nəfərin yaralandığı bildirilib.
İsraillilərin ötən həftə İordan çayının qərb sahilində həyata keçirdikləri hücumlarda 17 fələstinlinin yaralandığı, çoxlu sayda ev və avtomobilin zərər gördüyü bildirilib.
Qeyd edilib ki, İsrail ordusunun İordan çayının qərb sahilində bəzi yol və keçid məntəqələrini bağlaması səbəbindən bölgədəki fələstinlilər hərəkət məhdudiyyətləri ilə üzləşib, hətta işə gedə bilmirlər.
