Azərbaycanın maliyyə dəstəyi ilə Əfqanıstanın paytaxtı Kabildə yeni təhsil mərkəzi açılıb. "Afşar Ulduzu" adlanan bu mərkəz Azərbaycan Beynəlxalq İnkişaf Agentliyi (AIDA) tərəfindən maliyyələşdirilir və Afşar icmasından olan uşaqlar üçün təhsil məqsədilə qurulub.
Etnik olaraq azərbaycanlı olan Afşarlar, Afşar İmperiyasının banisi Nadir şahın hakimiyyəti dövründə Əfqanıstana köç ediblər. Təhsil mərkəzi Afşar uşaqlarına dəstək olmaq və onların mədəni kimliyini və təhsil imkanlarını gücləndirmək məqsədilə yaradılıb.
Modern.az-ın məlumatına görə, sözügedən təhsil mərkəzində oğlanlarla yanaşı qızlar da təhsil alır.
Qeyd edək ki, Talibanın idarəçiliyi zamanı qadınların hüquqları ciddi şəkildə məhdudlaşdırıldı. Belə ki, qadınların təhsil almaq və işləmək hüquqları əlindən alındı, burqa geyinmək və ictimai yerlərdə kişi qohumları ilə gəzmək məcburiyyəti gətirildi.
Artıq 4 ildir ki, əfqanıstanlı qızlar məktəblərə getmir, həmçinin ictimai həyatdan tamamilə təcrid olunublar. Buna baxmayaraq Taliban rejiminin hakimiyyəti altında yaşayan etnik azərbaycanlı qızların təhsilinə şərait yaradılıb.
