Avropa Şurası Parlament Assambleyasının (AŞPA) qış plenar iclasının açılış günündə Gürcüstanın nümayəndə heyətinin etimadnaməsinin təsdiqlənməməsi ilə bağlı təşəbbüs irəli sürülüb.
AŞPA-nın İsveçdən olan deputatı Boriana Oberq Avropa Xalq Partiyası siyasi qrupu adından Gürcüstanın nümayəndə heyətinin səlahiyyətlərinin təsdiqlənməməsi ilə bağlı çıxış edib.
Oberqin təşəbbüsü Assambleyanın reqlamentinin tələb etdiyi kimi ən azı 5 üzv ölkənin nümayəndə heyətindən olmaqla, ən azı otuz üzv tərəfindən dəstəklənib.
Məsələ ilə bağlı AŞPA-nın Monitorinq Komitəsi növbəti 24 saat ərzində hesabat, Qaydalar Komitəsi isə rəy təqdim edəcək.
Yanvarın 29-da AŞPA Gürcüstanın nümayəndə heyətinin səlahiyyətləri məsələsi üzrə müzakirələr aparacaq və səsvermə keçirəcək.
Qaydalara əsasən, Assambleya sabah mümkün üç variantdan birini seçməlidir.
AŞPA Gürcüstanın nümayəndə heyətinin səlahiyyətlərini təsdiqləyə bilər, müəyyən səlahiyyətlərin məhdudlaşdırılması şərti ilə təsdiqləyə və ya təsdiqləməyə bilər.
