Türkiyə, Azərbaycan və Özbəkistan arasında əla siyasi münasibətlər var.
Turkustan.az xəbər verir ki, bunu Türkiyə-Azərbaycan-Özbəkistan Üçtərəfli Biznes Forumundakı çıxışında Türkiyənin ticarət naziri Ömər Bolat deyib.
Bolat bu əlaqələrin iqtisadiyyat, ticarət, turizm, investisiyalar və inşaat sahələrində çox yaxşı səviyyəyə çatdığını vurğulayıb: “Ötən il Azərbaycanla ikitərəfli ticarətimiz 8 milyard dollara, qardaş Özbəkistanla ticarət dövriyyəmiz isə 3.3 milyard dollara çatıb".
Nazir bildirib ki, 2003-cü ildən bu yana Türkiyənin Özbəkistana ixracı 15, Azərbaycana isə 9 dəfə artıb. Eyni dövrdə Azərbaycandan Türkiyəyə idxalın 40 dəfə, Özbəkistandan isə 10 dəfə artdığını söyləyən Bolat Ankaranın iki ölkə ilə güzəştli ticarət müqavilələri bağladığını və bu anlaşmaların genişləndirilməsi üçün danışıqların davam etdiyini vurğulayıb.
Türkiyənin halal məhsulların inkişafı və halal standartlarının artırılması üçün Azərbaycan və Özbəkistanla qarşılıqlı əməkdaşlıq proqramları həyata keçirdiyinə diqqət çəkən Bolat çıxışına belə davam edib:
“Türkiyə ilə Azərbaycan arasında 37 milyard, Özbəkistanla isə 4.4 milyard dollarlıq qarşılıqlı investisiyalar da var. Həmçinin enerji, elektronika, mədənçıxarma, kənd təsərrüfatı, səhiyyə, İT və tikinti sektorlarında da özəl sektor investisiyalarını daha da artırmaq üçün səylərimizi gücləndiririk”.
Bolat çıxışında Türkiyənin işğaldan azad edilən Qarabağın yenidən qurulmasındakı fəaliyyətlərinə də toxunub.
Zəngəzur dəhlizi layihəsi çərçivəsində investisiyaların sürətlə tamamlanmaq üzrə olduğunu vurğulayan ticarət naziri bunları qeyd etdi:
“Uzaq Şərqi Avropaya birləşdirən Orta dəhlizlə Türkiyənin nəqliyyat sahəsində türk dünyası ilə yaxınlaşması, investisiya və ticarəti asanlaşdırması mümkün olacaq. Hökumətlər olaraq maneələri aradan qaldırırıq. Həmçinin özəl sektordan daha çox investisiya, ticarət və xidmətlər gözləyirik. Ümid edirəm ki, Türkiyə, Azərbaycan və Özbəkistan arasında dostluq və qardaşlıq əbədi qalacaq”./teleqraf.com
