Bu gün Bakıda parklanma ödənişsizdir? – AYNA-dan açıqlama 

Sosial şəbəkələrdə bu gün parklanmanın pulsuz olduğunu bildirən paylaşımlar edilib. Qeyd edilib ki, bu gün ölkədə iş günü olmadığı üçün paytaxtda parklanma ödənişsizdir.

Referans.az xəbər verir ki, deyilənlərlə bağlı Bizim.Media Azərbaycan Yerüstü Nəqliyyat Agentliyinin (AYNA) ilə əlaqə saxlayıb.

Qurumun mətbuat katibi Tural Orucov sayta açıqlamasında məlumatın doğru olmadığını bildirdi:

"Sosial şəbəkədə yazılanlar doğru deyil. Bu gün parklanma ödənişlidir. Biz bu haqda dəfələrlə demişik, yenə də xatırlatma verirəm. Nəqliyyat vasitələrinin parklanması üçün yalnız axşam saat 22:00-dan saat 07:00-dək, bir də həftənin bazar günləri ödənişsizdir.

Bayram günləri, qeyri-iş günləri bazar günlərinə təsadüf edəndə parklanma ödənişsiz olur. Amma həftə içərisinə düşəndə isə xidmət pulludur".