“Real”ın baş məşqçisi Karlo Ançelotti “qaymaqlılar”ın braziliyalı ulduz hücumçusu Vinisius Juniorun adı ətrafındakı şayiələri cavablayıb.
Arena.az xatırladır ki, “Vini” Səudiyyə Ərəbistanı klublarının fəal maraq dairəsindədir, ulduz futbolçu nəhəng təkliflər almaqda davam edir.
“Mən hər şeyi başa düşə bilərəm, bu, futboldur. Toni Kroos futbolu tərk edəndə, mən bunu, hamı anlamasa da, başa düşdüm. Müvafiq qərarlar fərdidir. Amma mən artıq demişəm ki, onu (Viniciusu) xoşbəxt görürəm. O, burada qalmaq və “Real” ilə qənimətlər qazanmaq istəyir. Düşünürəm ki, o, şöhrəti seçəcək”, – Karlo Ançelotti bildirib.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib.
Vinisiusun İspaniya nəhəngi ilə müqaviləsinin müddəti 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 26 oyuna çıxıb, 16 qol və 10 məhsuldar ötürmə ilə fərqlənib.
Vinisiusun “Real”da çıxışının ümumi mənzərəsi 291 oyun, 101 qol, 84 məhsuldar ötürmədən ibarətdir.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023), FIFA Qitələrarası Kubokun (2024) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 37 oyun keçirib, 5 qol vurub və 5 məhsuldar ötürmə verib. Vinisius Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” 24 yaşlı braziliyalı vingerin transfer dəyərini 200 milyon avro məbləğində qiymətləndirir.
