Bakı, 29 yanvar, AZƏRTAC
"Çox ciddi rəqibə qarşı oynayacağıq. Bu komanda ötən il Konfrans Liqasının qalibi olub. Bu il də Avropa Liqasına əsas namizədlərdən biridir".
AZƏRTAC xəbər verir ki, bu sözləri "Qarabağ"ın baş məşqçisi Qurban Qurbanov UEFA Avropa Liqasının əsas mərhələsində səfərdə Yunanıstanın "Olimpiakos" klubuna qarşı keçirəcəkləri VIII tur oyunundan öncə təşkil olunan mətbuat konfransında deyib.
O, görüşdə uğurlu nəticə qazanmaq üçün əllərindən gələni edəcəklərini bildirib: "Olimpiakos" sürətli və dinamik komandadır. Son matçda azarkeşlərimizi sevindirmək istəyirik".
Mütəxəssis uzun müddətdir "Qarabağ" klubunda işləməyinin sirrini bölüşüb: "Futbol kollektiv oyundur. Hər mövsüm yenilik olur. Komandaya cəlb olunan yeni oyunçularla balansı qorumağa çalışırıq. Mənim bəxtim orada gətirdi ki, yaxşı rəhbərliklə işləyirəm. Onlar hər zaman mənə dəstək olurlar. Allah əziyyətin qarşılığını yerdə qoymur".
Qeyd edək ki, yanvarın 31-də keçiriləcək “Olimpiakos” – “Qarabağ” görüşü Bakı vaxtı ilə saat 00:00-da başlayacaq. Hazırda Azərbaycan çempionu 3 xalla 34-cü, Yunanıstan təmsilçisi isə 12 xalla 12-ci pillədə qərarlaşıb.
