"Tramp administrasiyasının ata biləcəyi ilk və ən aşkar addım sonuncu sanksiya paketinin tam icrasını təmin etməkdir..."
Qərbin Rusiyaya qarşı sanksiyaları artıq misilsiz səviyyədədir, lakin ABŞ-ın yeni prezidenti Donald Trampın administrasiyası hələ də Moskvanın sıxışdırılmasını daha da gücləndirə bilər.
Moderator.az xəbər verir ki, bu barədə Amerikanın "Foreign Policy" nəşri yazıb. Məlumatı "comments.ua" nəşri yayıb.
Kolumbiya Universitetinin Qlobal Enerji Siyasəti Mərkəzinin əməkdaşı, ABŞ-ın keçmiş yüksək vəzifəli sanksiya rəsmisi Edvard Fişman bildirir:
"Düşünürəm ki, Bayden administrasiyası Rusiya energetikasına qarşı daha aqressiv olmalı idi. Onların ehtiyatlı davranışı hərbi texnika məsələsində olduğu kimi olub. Strateji baxımdan geniş enerji sanksiyalarının gecikdirilməsi silah tədarükündəki gecikməyə bənzəyib".
Məqalədə vurğulanır ki, Tramp administrasiyasının atacağı ən əsas addımlardan biri Rusiya Federasiyasının "kölgə donanması" adlandırılan 180-dən çox tankerinin sanksiya siyahısına daxil edilməsidir.
Digər bir yol isə ABŞ-ın ikinci dərəcəli sanksiyalarını tətbiq edərək Rusiya neftinin alıcılarını və vasitəçilərini cəzalandırmaqdır.
"Bu, Rusiya neftinin əsas alıcıları olan Çin və Hindistan kimi ölkələrdəki banklara, neft emalı zavodlarına və limanlara qarşı sanksiya təhdidlərini tələb edəcəkdi," - "Foreign Policy" izah edir.
Alternativ olaraq Tramp administrasiyası tanker sanksiyalarını daha da genişləndirə bilər. Məqalədə Avropanın artıq 16-cı sanksiya paketi çərçivəsində əlavə 70 kölgə tankerinə qarşı tədbir görməyi nəzərdən keçirdiyi xatırladılır.
"Bu variantların hamısı Bayden administrasiyasının son illərdə izlədiyi özünüməhdudlaşdırıcı yanaşmaya əsaslanır: əsas məqsəd neftin bazardan çıxarılması deyil, Rusiya neftindən əldə olunan gəlirləri azaltmaq olub. Çünki bu, qlobal qiymət artımına səbəb ola bilərdi", - məqalədə vurğulanır.
Məhz buna görə Tramp Davosdakı Dünya İqtisadi Forumunda OPEK üzvlərini hasilatı artırmağa çağırıb ki, bu da neftin ucuzlaşmasına və Kremlin gəlirlərinin daha sürətlə azalmasına gətirib çıxara bilər.
Lakin əlavə neft mənbələrinin haradan tapılacağı ilə bağlı qeyri-müəyyənlik ABŞ-ın qalan ən güclü sanksiyalarını tətbiq etməsini çətinləşdirir. Yanvarın əvvəlində ABŞ iki kiçik Rusiya şirkətinə qarşı bloklayıcı sanksiyalar tətbiq etsə də, böyük enerji şirkətləri hələ də hədəfə alınmayıb.
"Bayden administrasiyası "Qazprom Neft" və "Surqutneftqaz"a sanksiya tətbiq edib, lakin "Rosneft", "Lukoyl'', "Qazprom" və ya "Novatek'' hələ də toxunulmaz qalıb", - Fişman qeyd edir. O, əlavə edir ki, bu şirkətlərin dollarla əməliyyatlarını qadağan etmək Rusiyanın neft və qaz satışını ciddi şəkildə çətinləşdirəcək və bu, ən sərt variantdır.
