ABŞ-nin yeni seçilmiş prezidenti Donald Tramp Ukraynada münaqişənin sülh yolu ilə nizamlanmasına dair razılığın əldə olunmasına kömək edə bilər. CNN-nin yaydığı məlumata görə, bunu Vaşinqton administrasiyasının hazırkı rəhbərinin milli təhlükəsizlik üzrə köməkçisi Ceyk Sallivan deyib.
Sallivan qeyd edib ki, Tramp Ukraynaya olan hərbi yardımlardan narahatdır və eyni zamanda o, ABŞ üçün “yaxşı və ya uyğun anlaşma” əldə etmək istəyir.
Ağ Ev nümayəndəsi əlavə edib ki, Vaşinqtonun Kiyevə hərbi yardım kimi təsir rıçaqları əldə etməsi ABŞ üçün faydalı olacaq.
Sallivan onu da vurğulayıb ki, Tramp Moskva ədalətli razılaşmaya razı olmayacağı təqdirdə Rusiya tərəfinə Ukraynanı dəstəkləməyə davam edəcəyinə dair eyham vurmalıdır.
Qeyd edək ki, Rusiya ilə Ukrayna arasındakı genişmiqyaslı müharibə 2022-ci ilin fevralın 24-də başlayıb. Moskva işğal zamanı qoşunları Kiyevə qədər apara bilsə də, sonradan müharibədə üstünlük nisbətən Ukraynanın tərəfinə keçib. Ukrayna qoşunları ötən ilin iyunundan əks-hücum əməliyyatlarına başladılar. Amma bu da uğurlu olmadı. Son aylarda isə Rusiya yenidən döyüş meydanındakı vəziyyəti öz xeyrinə dəyişə bilib.
Tural
