İngiltərə Premyer Liqasının “Vest Hem”lə 19-cu tur səfər oyunu “Liverpul”un misirli ulduz hücumçusu Məhəmməd Salah üçün əlamətdar olub.
Arena.az məlumat verir ki, “qırmızılar”ın “şirlər”i 5:0 hesabı ilə darmadağın etdiyi oyunda Salah “Liverpul”un qələbəsinə qol və məhsuldar ötürmə ilə töhfəsini verib.
Beləliklə, cari mövsüm İngiltərə Premyer Liqasında Salah arıtq 8-ci oyunda qol və eyni zamanda məhsuldar ötürmə ilə fərlənib ki, bu da yarışın tarixi ərzində bir mövsümdə ancaq misirli ulduza müyəssər olmuş nailiyyətdir.
Həmçinin Salah İngiltərə Premyer Liqasında məhsuldar ötürmələrin sayı üzrə ilk onluğa düşüb. Misirli hücumçunun hesabında 82 məhsuldar ötürmə var.
Maraq üçün, İngiltərə Premyer Liqasında məhsuldar ötürmələrin sayı üzrə ilk onluğu təqdim edirik:
- Rayan Giqqz – 162 məhsuldar ötürmə;
- Kevin De Bröyne – 114 məhsuldar ötürmə.
- Sesk Fabreqas – 111 məhsuldar ötürmə;
- Ueyn Runi – 103 məhsuldar ötürmə;
- Frenk Lempard – 102 məhsuldar ötürmə;
- Dennis Berqkamp – 94 məhsuldar ötürmə;
- David Silva – 93 məhsuldar ötürmə;
- Stiven Cerrard – 92 məhsuldar ötürmə;
- Ceyms Milner – 89 məhsuldar ötürmə.
- Məhamməd Salah – 82 məhsuldar ötürmə.
Məhəmməd Salah 2017-ci ilin iyul ayından “Liverpul”da çıxış edir. İngiltərə nəhəngi həmin vaxt Salahın “Roma”dan transferi müqabilində 42 milyon avro məbləğində xərc çəkib.
Salahın “Liverpul”la cari müqaviləsinin müddəti 2025-ci ilin iyun ayının sonuna qədər nəzərdə tutulub.
Salah cari mövsümdə “qırmızılar”ın heyətində bütün yarışlarda 26 oyuna çıxıb, 20 qol vurub, 17 məhsuldar ötürmə verib.
Məhəmməd Salah cari mövsümdə İngiltərə Premyer Liqasının ən məhsuldar və ən səmərəli oyunçusudur. Misirli ulduzun hesabında Premyer Liqada 17 qol və 13 məhsuldar ötürmə var.
Misirli hücumçunun “Liverpul”un heyətində çıxışının ümumi mənzərəsi 375 oyun, 231 qol, 105 məhsuldar ötürmədən ibarətdir.
Salah “Liverpul”la bütün mümkün ali klub yarışlarının qalibi olub.
Misirli ulduz həmçinin “Fiorentina”, “Çelsi”, “Bazel” və “Əl-Mukavilun” klublarında çıxış edib.
Məhəmməd Salah hazırda kapitanı olduğu, 2011-ci ilin sentyabr ayında debüt etdiyi Misir yığmasının heyətində 101 oyun keçirib, 58 qol vurub, 33 məhsuldar ötürmə verib.
