Moldovanın “Daçiya” klubu “Əl-Nəsr”in portuqal ulduz hücumçusu və kapitanı Kristiano Ronaldoya müraciət ünvanlayıb.
Arena.az “Daçiya”nın mətbuat xidmətinə istinadən məlumat verir ki, klub portuqal ulduzu, futbolçu karyerasını Moldova komandasında davam etdirməyə dəvət edib:
“Kristiano Ronaldo hələ də “Əl-Nəsr” ilə müqaviləsini yeniləməyib və bu qış təkliflər üçün açıq olacaq! Biz “Daçiya” akademiyasında hesab edirik ki, onun futbolçu karyerasını davam etdirmək üçün ən yaxşı həll bir neçə səbəbə görə bizim klubumuzdur.
Birincisi, o, başqa rənglərə alışmaq məcburiyyətində qalmayacaq – biz də sarı və mavi rənglərdə oynayırıq. Karyerası başa çatdıqdan sonra isə biz ona klub rəhbərliyində beynəlxalq akademiyanın səfiri və ya uşaq dəstəsinin məşqçisi qidmində yer vəd edirik (“Mançester Yunayted” və ya “Real”a başçılıq etməzdən əvvəl karyeranıza haradasa başlamaq gərəkdir – redaktorun qeydi)! Kristiano, biz səni gözləyirik”, – “Daçiya”nın sosial şəbəkə hesabları üzərindən paylaşdığı müraciətdə deyilir.
Qarşı tərəfin bu təklifə qarşılığı haqda məlumat yoxdur.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib.
Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 19 oyuna 16 qol və 3 məhsuldar ötürmə ilə fərqlənib.
Kristianonun “Əl-Nəsr” karyerası ümumilikdə 83 oyun, 74 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Ronaldo Portuqaliya yığmasının heyətində 215 oyuna 135 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
